بولوت قاراچورلو سهند:
( جان اشتایین‌بکه )
حییفسیله‌نیرم، او گونلریمه،
خیرسیز بیر نامرده آلدانماغیما
او،اینسان آدینی اوغورلیانین
تزویر کارلیغینا توولانماغیما.
آز دگیل، 20 ایل، من بو نامردی،
بیراینسان تانییب، تانیتدیرمیشام.
بیر چوخ اؤزومدن‌ده ساده‌لرینه،
بوتون یازدیقلارین اوخوتدورموشام.
سن دئمه، دئینلر دئدیگی کیمی،
بؤیوک محک ایمیش‌اینسانا زامان.
شله‌نه قدرده قابا اولسایمیش،
آخیرسی کئچرمیش ایپ دوواناقدان.
دونیانین غریبه اویونلاری وار
اینسان دا بو قدر تئز آلدانارمیش؟
بو آلدانماق دگیل، ساتیلقانلیقدیر،
اشتایین‌بکی‌ده آلماق اولارمیش؟
بازار چوخ قیزغیندیر یئنی دونیادا،
وجدان‌دا بیر ماتاح کیمی ساتیلیر.
بیر اووج دولارا، بیر اووج پولا،
شرفین، ناموسون داشی آتیلیر.
«غضب سالخیملارین» یارادان اللر،
غضب اوردوسونا توپ‌دا آتارمیش.
فاشیزم علیهینه یازان قلملر
اله‌نیب-دولانیب فاشیست اولارمیش.
بوگون ویتناما سوخولانلارین،
فاشیست اوردوسیله فرقی هاردادیر؟
اودااینسان قانی ایچیردی، بو دا
باخسان همان آشدیر، همان کاسادیر.
بو قودوزلوقلارا قارشی دونیادا،
اعتراض سسلری گؤیه گئدرکن
«سارت»لار، «راسل»لر محکمه قوروب
اینسان جلادلارین محکوم ائدرکن،
ماسقالی بر یانکی، آخماق بیر کابوی،
وار-یوخون اوتوز، وجدانین ساتیر.
مظلوم و مبارز بیر خلقه قارشی
شرفین گلوله ائیله‌ییر، آتیر.
ویتنامدا چوخ توپلار آتیلیر هر گون
سن‌ده آت توپونو، گلسین، «قهرمان»
بلی، ذاتی قیریق بیر «ضیالییا»
شرفلی یاشاماق دگیلدیر آسان.
ایندییه قدر هئچ فیکیرلشمیسن،
ویتنامدا نه گزیب، نه آختاریردین؟
ماشانی چکرکن هئچ بیر دوشوندون
کیملرین اوستونه آتش آچیردین؟
قلم-توپ، اریمیش قورشون مرکب،
کاغاذ بیر حق سئوراینسان سینه‌سی.
یاز، «بؤیوک محرر» اسیرگمه، یاز:
جان اشتایین بکین آخر سوژه‌سی.
یاز، قوی شیطانلارین بارگاهیندا
کئچمیشینین اوستون اؤرتسون بولکه
یاز، قوی باش اگدیگین یئنی تانریلار
«اسکی گناهیندان» گؤز اؤرتسون، بلکه!
***
ویتنامدا چوخ توپلار آتیلیر هر گون
سن‌ده آت توپونو، گلسین، «قهرمان»
بلی، ذاتی قیریق بیر «ضیالییا»
شرفلی یاشاماق دگیلدیر آسان.
آت گلسین، توپوندان چیخان گولله‌لر،
تکجه ویتناملینی قیریب اؤلدورمور.
حیاتین ماراقلی سیناقلاری وار،
اونلارلا «اشتایین بک»لرده اؤلور.
باخما، هله نفس چکیرسن ساتقین
اؤلوم، تکجه دگیل، نفس چکمه‌مک
چوخلار نفس چکمیر، یاشاییر، اما،
چوخلار نفس چکیر، اؤلودور-دئمک.
سلام
آماده تبادل لینک با شما هستم اگر آماده هستی به ما اعلام کنید تا با چه اسمی لینکتون کنیم
همچنین به وبلاگ ما سربزنید و توهین مردم بی فرهنگ انزلی را به ملت عزیز آذربایجان و تبریز محکوم کنید البته با نظر خواهی شما
امید است به پیروزی ملت آذربایجان و ایران اسلامی
با تشکر
دکتر ابراهیم اقازاده اصل
مدیریت وبلاگ آذربایجان
رئیس جمهور دوره شانزدهم